ما تقيدش

ما تقيّدش، اش قام عليك؟ الاحزاب الكلها ما جات شيء، الكلها تتمعش و تحب تاكل الخبزة على حسابك. الكلها تتعب فيك و تخرج فيك في القوايل باش تعطيها بلاصة كادو في المجلس التأسيسي. الاحزاب ما على بالهم بيك راهو. بطال؟ ماهمش باش يلوجوا لك على خدمة. تخلص شوية؟ ماهمش باش يزيدوك. اللحم غالي؟ ماك تعرف في تونس ما نوخروش لتالي، شيء ما يرخص. بلدية موش تنظف؟ باش يحطوا لك رئيس بلدية راقد بالنوم كالعادة. الكار الصفراء معذبتك؟ باش تقعد معذبتك، غير بركة يبدلوا لك لونها كهو (اللهم انتخبت الشابي عاد).

ما تقيّدش، اش قام عليك؟ هالخوضة اللي باش تعملها لروحك. لاك فاهم شكونه المجلس التأسيسي، لاك فاهم شنوة باش يعمل، لاك فاهم شنوة معناها نظام القائمات النسبية، لا و زاد كمل عليك بفازة الباقي الاكبر. تمشي تقرا Etude باش تنتخب ياخي؟ جاوشي فسروا لك؟ في التلفزة فهموكش؟ استدعاوكشي لبرنامج هكة و فرحوا بيك، و جابوها لك بالفلاقي الفصيح، راهو كذا و كذا..؟ تمشي انت تدور و تكسر راسك و تلوج و شوف تفهم شوف لا؟ مالك و مالهم، خليهم ياكلوا بعضهم بعيد.

قداشهم برشة، قداشهم ما يتفرزوش، و اساميهم كيف كيف، و برامجهم كيف كيف، و اللي هذا يقل لك انا شريف ولد الفاضل، و هو دوسيه أكحل زفت. الكلها تسب في بعضها، الكلها لاهية ببعضها، و تهبط ورقة على واحد، و بعد ساعة تهبط ورقة اخرى تكذب الورقة الاولى، و انت ماللي كنت ماكش فاهم، تولي ماكش فهم حتى شيء خلاص. شكون باهي؟ شكون بيوع؟ شكون يخدم في الشعب؟ شكون يخدم في روحه؟ شكون يحب على الفوضى، شكون يحب على كلمة الحق؟ ما تفهم شيء، و تجي تبع تدوخ. في كل شيرة تلقى واحد يحكي على ثورة الكرامة. و الثورة المباركة. و انت تدور ما ترى في حتى بركة و حتى كرامة. وسخ، بطالة، حاكم يضرب، ناس في الحبس، ناس هاربة مالحبس، فضايح، ناس تسب في بعضها، تلافز راقدة بالنوم، تلافز تحسب في حسبتها. كالعادة يعني!

و انت خويا في وسط هذا الكل، اش قام عليك داخل في المرمة هكاكة؟ هاك شاد بلاصتك و رايض. ثمة ناس متعودة و موالفة بريق الانتخابات هذا. كل عام عندهم abonnement في الكار بلاش، على كل صبة عندهم 5د تلفون. يترقاو فيسع، يجيبوا ماكلتهم مالشعبة في رمضان، الحاكم ما يدورش بيهم. ناس كيفك كيفهم، اما هوما ساكتين لابدين، و في وقت كيف هكة، هوما يخرجوا، يمشيو يقيدوا بلاش عياط، بلاش صياح.. مليون و الا ثنين. كل واحد يعرف شكون باش ينتخب، مقيدة في ورقة التعليمات. كيفهم راهم، ماهمش ذكيين عليك، و ماهمش فاهمين شيء مالانتخابات، اما يعرفوا شنوة باش يعملوا. يعرفوا اللي كيف يختاروا فلان، و الا فلتان باش تقعد الابونمونات ماشية و باش تقعد الماكلة موجودة في الشعبة، و باش يقعد الحاكم مبجلهم و ما يدورش بيهم. خاطر كان هوما ماشين ينتخبوا. انت ماكش لاهي، و ماكش فاهم اللي الاحزاب الكلها كيف بعضها، مادامها ماهيش مالتجمع. يعرفوا اللي هوما باش يربحوا خاطرك تبحرك، و فديت مالسياسة و ماللي جابوا السياسة لتونس. يعرفوا اللي العام الجاي باش ترجع الامور كما كانت عليه، خاطرك باخل باش تاقف دقيقة قدام البلدية، تجيب ورقة انتخاب، و باخل تمشي نهار 23 اكتوبر تجبد اي ورقة ماهيش تجمعية من 100 ورقة، ترمي والديها في الصندوق و تقول : تفو على الشعب. تفو على القوادة، تفو على الرشوة.

ما تقيدش، خا نرجعو كيف ما كنا، و يا ناس ما كان باس!

دستوري "نظيف" .