التكمبيس يبدأ الآن..

البارح، و في غفلة من الاحزاب الكل، و في وقت الناس الكل لاهية فيه تعس على السعداوي يتعداشي مالحومة، تحطت بلايك في الشوارع فيها وجيّه سمح نور التقوى في عينيه، و شعره منسدل على كتافه، و بحذاه امرأة ملايكة موش لعب، يتبسموا بتفاؤل و رضا عن المستقبل.. tiens حتى مالجملة المكتوبة فوقهم تحكي على المستقبل.. انا مالاول في بالي اشهار بنك تونس العربي و الا هي شركة تأمين، شوية شفت اكة الشعار الشهير برشة متاع البي دي بي باش فهمت الحكاية (الاحزاب الكل في تونس حاطة زيتون في شعارها، كان حزب التجديد تقريب سارق شعار الويفا). اسيدك عمي نجيب بدا الحملة الانتخابية متاعه ـ على بكري شوية تقريب ـ بما أنه الحملة مفروض تبدا قبل ثلاثة جمعات، هو يقل لك مادامني حاضر علاش نقدّم روحي وسط الزحمة؟ قانون؟ قانون رجعي ما يحوكش مع التقدميين..

تي لا علينا، خا نتلهاو بالبرنامج الشـْـباب ـ ي. بالطبيعة الواحد قبل ما يقرأ يحط في مخه اللي احنا ما ناش قدام انتخابات رئاسية و تشريعية، و انما انتخابات مجلس تأسيسي، و المجلس التأسيسي مهمته اعادة هيكلة الدولة، يعني مهمة سياسية و تشريعية أساسا. ممكن يعدي مشروع و الا اثنين اقتصاديين، و الا طرف قوانين ذات بعد اجتماعي، اما الرسمي الرسمي، هيكلة الدولة، ضمان فصل السلط، ضمان الحريات الاساسية، و ضمان التعددية و القطع التام مع اشكال الدكتاتورية. ما نعرش اما في بالي هذم الامور اللي يلزم يحكي لنا عليهم كل حزب، كيفاش يراهم و كيفاش يحب ينفذهم. أيا نرجعو لعمي نجيب و نشوفو شنوة حكى لنا.

اسيدك قسّم البرنامج على اربعة : اصلاح سياسي و دستوري، اجتماعي، اجراءات طارئة للفلاحة و السياحة و التشغيل، و اخيرا منظومة تنمية اقتصادية جديدة. بون مالواضح انه اهتمامه اقتصادي اكثر منه حاجة اخرى في مجلس تأسيسي. ما نعرش شنوة باش تخدم الدولة (حكومة و مجلس تشريعي و ما تابع). اما خا نعملو طلة اش حكى فيهم..

أول حاجة يحب يعملها عم نجيب، هي إعلان عن الحقوق و الحريات، وثيقة فوق الدستور، ما تتبدلش بأي شكل من الأشكال، يعني مستحيل تتبدل حتى لو الشعب قال نبدلوها، حتى لو افكارها عفا عليها الزمن. هذه بالطبيعة فكرة يحاربوا عليها عندهم مدة في مجلس عياض، و قالوا النهضة ما تحبش عليها وقت اللي تكلموا عليها و عارضوها ماهمش النهضة. الفرق انه اقترحوا هوما باش تكون ذات صيغة اخلاقية للاحزاب، توة يحبوها ذات صيغة الزامية للدولة. و هنا نحب نفهم حاجتين : هل انه عم نجيب فاهم بالحق شنوة معناها دستور؟ و هل أنه فاهم شنوة معناها "تقدمية" اللي ينادي بيها؟ خاطر حد علمي الدستور هو أعلى قانون في الدولة، شنوة معناها قانون فوق أعلى قانون في البلاد؟؟ و ثنين، هي قوانين نيوتن اللي عملها بالماط و الفيزيك، و أسس بيها لرؤية علمية للكون، جاء نهار و طلعت شطرها عالحيط، و نقحها أينشتاين و الكلنا نعرفو اللي نظرية أينشتاين هي بيدها عالحيط و فيها برشة علل. شنوة معناها هو قانون ما يتبدلش؟ ما علموش التاريخ اللي كل شيء ينجّم يتبدل؟ بالطبيعة الحريات المذكورة تظهر لنا حاجة بديهية جدا، لكن علاش ما يكفلهاش الدستور؟ شنوة لازمته الاعلان؟

ثاني حاجة، بابا نجيب يحب رئاسة الجمهورية 5 سنين تتجدد مرة وحدة (كيف ماما أمريكا) و الرئيس عنده حق النقض بخصوص المصادقة على القوانين باش يتعاود التصويت، اما ما عندوش حق حل البرلمان مثلا، و الحصانة القضائية تتنحى بعد ما يكمل الفترة الرئاسية، و هذه امور معقولة و لو أنه ما عنده علاش يتمتع بحصانة تخليه يعيث فيها فسادا و يستر معالم الجرائم قبل ما يخرج منها..

ثالث حاجة و هذه مهمة، عم نجيب يحب نعملو كيف أمريكا، كونغرس فيه مجلس شيوخ و مجلس نواب. بالنسبة ليه البرلمان هو اللي يعين الوزراء و السفراء، ما فهمتش شنوة وقتها دور رئيس الدولة المنتخب؟ اذا كان ما ينجمش يختار ايكيبة اللي باش تخدم معاه، شنوة محلّه مالاعراب؟

في الرابعة، حكى عم نجيب على القضاء و قال المجلس الاعلى للقضاء ينتخبوه القضاة و مجلس النواب. هو اللي يثبت في قانونية القوانين و تطابقها مع الدستور و مع الاعلان اللي حكيت عليه.

توة الكلام على السلط الثلاثة معقول و لو أنه قديم و متداول و ما فيهش برشة جديد، سواء الاعلان الـ"تقدمي" و حكاية مجلس الشيوخ و الا المستشارين اللي ما قالش شنوة مهمتهم بالضبط، اما اللي بيه الفايدة و اللي الناس تحب تعرفه : كيفاش باش يضمن التفريق بين السلط؟ كيفاش باش يضمن انه القضاء ما يكون عنده تبعية لمجلس النواب مثلا؟ كيفاش يضمن انه الرئيس ما يكونش ماريونات؟ ما ذكر شيء بخلاف كلام من نوع : L’indépendance de la justice sera instaurée et garantie. كيفاش؟ الله و عم نجيب أعلم.

بالنسبة للتقسيم الاداري، عم نجيب زادنا عفسة جديدة، قال لك بخلاف المعتمديات و الولايات، نزيدو "الجهات" باش انحيو المركزية. تولي عندنا 30 ولاية و 6 جهات. و لو انه الجهات ظاهرين شنومة، اما الولايات ما فهمتش كيفاش باش يردهم 30؟ موش نورمالمون يقول لنا شنومة الولايات اللي يحب يزيدهم؟ ماو كان باش يعمل ولاية منزل بورقيبة انا شخصيا ننتخبه هههه  الجهات يا سيدك تتمتع بتمويل قار، تتصرف فيه وحدها. اي موش معناها هذا، يلزم انتخابات على مستوى الجهات؟ شكون اللي يحكم؟ مستشار كيف في ألمانيا؟ حاكم كيف امريكا؟ يعيّن من قبل البرلمان؟ من قبل الرئيس كيف الوالي؟ يا عم نجيب علاش هكة تلوح لنا شطر حكاية و تمشي على روحك؟

نجيو توة لأهم حاجة في الخرافة الكل، البوليس و الحريات، عم نجيب قال لك نحدثو ثورة في سلك البوليس، يا سيدك باش انحو البوليس، باش يولي عندنا زوز أجهزة، جهاز بوليس قضائي، تحت وزارة العدل، مهمته يكرفط و يحط في الحبس بأمر مالقضاة. و الجهاز الثاني، جهاز استخبارات داخلي مهمته فقط جمع المعلومات حسب هم نجيب هذا الجهاز تابع لوزارة الداخلية. يجمع المعلومات و يقدمها لوزارة العدل، و كيف تبدا معلومات تهم الامن الوطني يقدمها للحكومة (علاش الحكومة؟! اش تعمل بيها؟ و وزارة العدل موش تابعة الحكومة؟). الحق ما نعرفش بلاد تخدم بالطريقة هذه، جديدة عليّ اما نحب نعرف بركة جهاز الاستخبارات التابعة للداخلية كيفاش باش "يلم المعلومات"؟ هاو قال لك ممنوع عليه التحقيق، و الاستجواب بالكاميرا، و تزيد تنحي القوادة، ما فهمتش الاستخبارات كيفاش باش تخدم؟ اللي فهمته مالحكاية الكل، نقّل الداخلية في وزارة العدل، و نقل امن الدولة للداخلية و نحى لهم وسائل الانتاج، و ما قالش على وسائل الانتاج البديلة.

المعتمديات شنية وظيفتها؟ شنوة تخدم؟ كيفاش؟ البلديات شنوة وظيفتها؟ كيفاش هيكلتها؟ كيفاش الانتخابات متاعها؟ الولاة شكون يعينهم؟ كيفاش يخدموا؟ هذا الكل ما يهمش عم نجيب. الحريات الاساسية قال يكفلها الاعلان، ما غير ما جبد شيء على هالحريات (منع التعذيب، حرية التعبير، حرية الجمعيات و الاجتماعات، حق الدفاع، حق المحاكمة العادلة، و مبدأ المساواة بين الجنسين) شنوة الهياكل اللي تضمن هالحريات؟ كيفاش باش نحققوهم؟ الخ.

القسم الثاني الاجتماعي، حكى فيه على حاجات غريبة شوية : الصحة و القدرة الشرائية و الضرائب و المدرسة. ياخي المجلس التأسيسي شنوة دخله باش يخدم على المستويات هذم؟ لواش نعملو في انتخابات مبعد؟ بون بالنسبة للصحة، مشكلته الوحيدة نعلمو سبيطارات في الشمال الغربي و الوسط الغربي و الجنوب الشرقي. و نزيدو في التي في آ باش نستعملوه في التنمية الصحية. علاش موش فلوس البروموسبور؟ علاش موش ضريبة الدخل؟ علاش موش فلوس 26 26؟ ما نعرش، الخبراء متاع عم نجيب قالوا التي في آ. في القدرة الشرائية هنا ناقف شوية : قال لك عم نجيب التقدميون يلتزموا باش يرفعوا السميغ في 2012 الى 8 بالمائة! يا بابا! يا عمي! يا خويا! راك قاعد في المجلس التأسيسي، راك تحكي على انتخابات المجلس التأسيسي! اش مدخلك في 2012؟ من توة ناوي تركز روحك في الكرسي؟ سايس روحك عيش خويا، و ما تسبقش الاحداث. تلهى بالمجلس التأسيسي بابا، قانون الاحزاب، قانون الانتخابات، مجلة الاحوال الشخصية، قانون الجمعيات، النقابات، هذم اللي باش تحكي عليهم في المجلس التأسيسي عيش خويا، شنوة رايك فيهم؟ شنوة باش تبدل فيهم؟ تجري تحب تدخل الصغار للمكتب من عمر 5 سنين شمدخلك ياخي؟

رغم هذا تلهى اقتصاديا بالامور المستعجلة، و قدم رؤية للحاجات اللي يلزم يتعملوا في القريب العاجل لانقاذ الاقتصاد الوطني : السياحة و التشغيل و الفلاحة. في التشغيل قال عم نجيب يلزم نعملو مشاريع كباااار لتهيئة البنى التحتية للاستثمارات. كلام هذا نعرفوه و حافظينه، اي شنية المشاريع اللي تقترحها سيادتك؟ لا يوجد. ما قال شيء. و انما دار يحكي على السكن oO" اي و الله على السكن، قال لك الـFOPROLOS نتعاونو معاها باش نبنيو المساكن الشعبية. ما نعرش شنوة دخلها في التنمية اما عندها دخل. ثمة 60 مشروع نموذجي للتنمية الحضرية باش يتعملوا و بالطبيعة ما نعرفوش التفاصيل، الا كون بنك التضامن هو اللي باش يتلهى بيهم. مراجعة خلاصة القروض الفلاحية، و السياحة و انقاذ السياحة بالنسبة لعم نجيب، هي نخلصو الماء و الضوء لجماعة الوتلى باش ما يفلسوش -_-"

يا اكة هو، و يختمها عم نجيب بالخطوط العريضة لتنمية الغد (مرة أخرى شمدخله)، اسيدك أولها محاربة الرشوة. يعني الرشوة ماهيش مشكلة اجتماعية، مشكلة تنموية، اي كيفاش نحاربوها؟ سرّ المهنة. انتخبوني توة تشوفوا... ثانيها كيفاش استقطاب الاستثمار و التشجيع على الشركات الصغرى و المتوسطة؟ فلوس و تشجيع للشركات متاع الهاي تاك. اي شبيه، و الضرائب؟ عم نجيب باش يراجعها، جماعة التلكوم (اكثر ناس تدخل فلوس) باش يدفعوا ضرايب اقل 5 بالمائة. (عندنا ازمة في الاتصالات)، النسيج اللي في ازمة؟ ما يهمنيش، خليه 20 كالشعب الكل.

مالاخر عم نجيب عامل برنامج انتخابي لا تفهم للمجلس التأسيسي و الا للانتخابات الرئاسية و التشريعية. مرض السلطة خايب برشة، يخليك تحلم في كل بقعة، يخليك تحكي على روحك وقت اللي يلزمك تحكي على الاخرين, يخليك تنسى ضعفك و تتخيل روحك بلا حدود، اكبر مالناس و ما تستحقش اعانة، مرض السلطة يخلي الناس الاخرين الكل خصوم، موش اولاد بلاد. و مرض السلطة يخلي المجلس التأسيسي كرسي حكم، موش هيئة تأسيس دولة ديمقراطية.

البرنامج