بالقاعدة..

في تونس ما تستحقش تهبط تدور و تسأل و تبربش و تتسلل و تندس باش توصل للحقيقة. تشد بيروك و تخمم شوية، و تتصور، توة تكشف الحقيقة الكل. هذا على ما فهمت من صحافتنا العظيمة، اللي تكشف الخور و المخططات من الانترنت. في تونس، تنجم تنتمي لتنظيم القاعدة، تصول و تجول في الجنوب ما يحكي معاك حد، تهرّب السلاح مالدزاير، و الناس تراك و ممكن خبرت عليك، و ما يصير لك مع هذا شيء، لكن كيف الحكومة تتأزم وضعيتها و يولّي ثمة احتقان شعبي، مزمرة عليك، باش توليّ في راسك الحكاية.. في تونس بن لادن يشكر الثورة و شباب الثورة و القاعدة تعمل عملية ارهابية من غدوة. في تونس، موزاييك تعرف هوية المجرمين المسلحين قبل الداخلية و الجيش. في تونس السائق يقول هبطت زوز، الجيش يقتل زوز، الجزيرة تحكي على زوز ارهابيين، رئيس المركز يقول ثمة زوز ارهابيين، و الداخلية تقول لا راهم ثلاثة. في تونس، القاعدة تنتقم لمقتل بن لادن، موش في أمريكا.. في تونس القاعدة ما تسربش السلاح من جهة ليبيا اللي داخلة في حيط، انما من جهة الجزائر حيث الجيش هو الحاكم الناهي، و في تونس جماعة القاعدة يضحيوا بالمهمة متاعهم و بحياتهم خاطر ما يحبوش يحطوا دبشهم في الـporte bagage.. في تونس زادة، كيف يهرب سجين خطير جدا و ارهابي محكوم عليه من 2003، ما يعلنش البوليس على حملة تفتيش في الوقت، و ما ينطق كان كيف تصير كارثة كان ممكن تكون اكبر لو كان القاعدة درّبت جماعتها مليح على رميان القنابل... في تونس، المخابرات من كثر ماهي قوية، صورت هالارهابي و هو محجّم (كيفاش خطر له و حجّم)، و صورته و هو باللحية في نفففس الوضعية، نفففففس اللبسة، نفففس التلفيتة... برافو و برة. في تونس، تقعد سنين في الحبس، ما يصورك حد، ما عندكش حتى تصويرة واضحة في دوسيك، و أخيرا، في تونس سواء كانوا هالحيوانات تابعين الاقامئي (امارة القاعدة في المغرب الاسلامي)، سواء كانوا ارهابيين يتحكم فيهم ادارة امن الدولة في تونس و تخرجهم وقت ما تستحقهم، او أنهم ثمرة تعاون مع المخابرات الجزائرية.. في الحالات الكل، يلزمهم يعرفوا اللي من العقيد الطاهر العياري  ثمة الف، و أنه كل مدينة في تونس، هي روحية، و فيها وليد حاجي يستنى فيهم.